ون كراون لعبة بطاقات كويتية مستوحاة من العصور الوسطى… الخيانة، الكذب، والتحالفات المؤقتة هي سلاحك الوحيد للوصول للعرش. الهدف واضح. اجمع أكثر ذهب وختم الجولة الرابعة وانت الملك. بس الطريق للعرش مو سهل. كل كرت يفتح لك حركة مختلفة من خطط ذكية إلى مؤامرات تخريبية. يمكن واحد من ربعك مضايقك طول اللعب؟ نزل كرت الببغاء الملكي وخليه يدفعلك ١٠٠ ذهب ويعيد جملة من اختيارك بصوت حاد مضحك. لعبة ون كراون تنلعب بين ٤ إلى ٨ أشخاص. الهدف إنك تجمع أكثر ذهب وتخلص اللعبة وإنت الملك بعد ٤ جولات. بالبداية، واحد من اللاعبين يسحب بطاقة الشخصية الحمره ويصير الملك، والباقي نبلاء. الملك يبلش ومعاه ١٠٠٠ ذهب، وكل نبيل عندهم ٦٠٠. الذهب ينحسب بالتيجان الصغيرة على بطاقة الشخصية. الملك عنده أوراق خاصة عشان يفرق بين النبلاء ويخليهم يتهاوشون، والنبلاء عندهم أوراق ثانية. كل لاعب يبلش ومعاه ٨ أوراق كل كرت له حركة خاصة. في كروت تسرق ذهب، تحميك، تفرق بين الناس أو تسوي فوضى. كل كرت يقرّبك أكثر حق التاج بطريقته. حط عدّاد الجولات بالنص، وهو يبين إذا اللعب يدور مع عقارب الساعة أو عكسها حسب كل جولة. الجولة تبدي من الملك: يلعب ٣ أوراق ويسحب ٣ بعد دوره (أو ٢ و٢ إذا بس في ٣ نبلاء). بعده كل نبيل بالدور يلعب ورقتين ويسحب ورقتين، لين يرجع الدور للملك. بعد ما يخلصون الكل، يبدي مرحلة الصفقات. عندكم دقيقة إلى دقيقتين تساومون، تبدلون ذهب، تبدلون أوراق، أو تسوون صفقات مع بعض. عقبها تبدي الجولة اللي بعدها، ونكمل لين نوصل ٤ جولات. وأي وقت واحد من النبلاء يصير عنده ذهب أكثر من الملك، على طول يبدلون كراسي وياخد التاج وأوراقه وذهبه. بعد الجولة الرابعة، اللي يكون ماسك التاج ومعاه أكثر ذهب هو الفايز. لتلخيص كل شيء: وزّع بطاقات الشخصيات واستعملها لتتبع الذهب. اللاعب اللي يحصل البطاقة الحمراء يصير الملك. بعدين وزّع ٨ بطاقات لكل لاعب. يبدأ الملك ويلعب ٣ بطاقات ويسحب ٣. اللاعب اللي بعده يلعب بطاقتين ويسحب بطاقتين إلى أن يخلص دور الجميع. بعد ما يخلصون، تبدأ مرحلة الصفقات وتتبادلون الذهب والبطاقات والخدمات لمدة دقيقة إلى دقيقتين. بعدها نكرر العملية لأربع جولات. اللاعب اللي ينهي اللعبة وهو الملك يكون الفايز. محتويات اللعبة - حوالي ١٠٠ بطاقة - بطاقة عدّاد الجولات - دليل اللعبة - كيس أحمر فيه نرد وتيجان صغيرة